Laugalandsskóli

Mikið og gott samstarf er milli leik- og grunnskóla á Laugalandi og eru eftirfarandi markmið sett í leikskólanum varðandi samskiptin:

Að vinskapur og félagsleg tengsl barna í leik- og grunnskóla viðhaldist og styrkist
Að veita börnunum stuðning og öryggi með tengingu og samfellu skólastiganna
Að elstu börn leikskólans fái gott tækifæri til að kynnast með markvissum hætti aðstæðum og skipulagi fyrir skólabyrjun
Að leik- og grunnskólakennarar yngsta stigs þekki starf hvers annars og geti þannig myndað samfellu í námi og kennslu barnahópsins
Að skólarnir stuðli að samfellu í uppeldi og menntun og efli tengsl og samvinnu sín á milli, eins og áhersla er lögð á í námskrám beggja skólastiga
Að bæði skólastigin vinni út frá sömu hugmyndafræði og kennarar af báðum skólastigum setji sér sameiginleg markmið með samstarfinu og samræmi kennsluaðferðir (námsaðferðir) svo gæði og skilvirkni náms verði sem best
Að skapa sameiginlega sýn á milli skólastiganna þar sem nýtt er það besta frá báðum skólastigum
Að skapa meira öryggi fyrir foreldra þegar börn þeirra skipta um skólastig
Að taka mið af þörfum barnahópsins og móta vettvang þar sem nám fer fram
Að mæta þörfum hvers og eins án þess að flokka aðeins eftir aldri
Byggja nám og kennslu á reynslu barnanna

Samráðsfundir

Skólastjórnendur funda leik- og grunnskóla funda reglulega í gegnum skólaárið. Á fundunum er samstarf skólastiganna rætt og hvernig megi efla það og styrkja enn frekar.

Á vorin er haldin sérstakur fundur þar sem farið er yfir þau gögn sem fylgja nemendum yfir á næsta skólastig. Þann fund sitja, ásamt skólastjórnendum, deildarstjóri og væntanlegur umsjónarkennari.

Reynt er að samræma einhverja starfsdaga beggja skólastiga en þannig er möguleiki á að samnýta námskeið og ýmsa fræðslu fyrir starfsfólk skólanna.

Sundtímar

Tveir elstu árgangarnir leikskólans fara í sundtíma vikulega að hausti og vori undir handleiðslu sundkennara úr grunnskólanum. Markmið með sundtímum er að efla öryggi og vellíðan í sundi ásamt því að læra þær reglur sem gilda um fataklefa og sundlaugina. Í sundtímum er unnið með ýmsa fimi í vatni, farið í leiki og gjarnan er farið í rennibraut í lok sundtímans.

Skólaheimsóknir

Skólaheimsóknir í grunnskólann hefjast að hausti fyrir elsta árgang leikskólabarna. Þá fara nemendur og taka þátt í einni kennslustund með 1. bekk aðra hvora viku og hina vikuna fara þau eina kennslustund í dagskóla með 1. og 2. bekk. Á þennan hátt kynnast þau umhverfi, reglum og venjum sem ríkja í grunnskólanum. Einnig styrkja þau og viðhalda vinskap sem myndast hefur á fyrri árum í leikskólanum. Að vori fara elstu nemendur leikskólans þrjá daga í grunnskólann. Þá eru þau lengur en einn tíma í senn og prófa að fara í frímínútur, borða nesti og hádegismat með grunnskólanemendum.

Skemmtanir

Nemendum leikskóla er boðið á ýmsar skemmtanir grunnskólans s.s. generalprufu jólaskemmtunar og árshátíðar.

Dagur íslenskrar tungu

Á degi íslenskrar tungu bjóða leikskólanemendur yngstu árgöngum grunnskólans til sín og halda sameiginlega samverustund þar sem m.a. er lesið og farið með ljóð.

Bókasafn

Leikskólinn fær afnot af bókasafni eftir þörfum.